Boatsoj ja luonndo
Boatsoj le ruoppsisgåddejudos sierralágásj fámujn vistijt åmastit. Guododimluohkko mierret bierggobuvtadimev.
Boatsoj le ruoppsisgåddejudos mij tjårrågin viessu Europa, Asia ja Nuorttaamerijka nuortap bájkijn. Boatsoj le smieritjiddje ja sierra fámujn vistev suddadit. Giessejahkebielen rásijt, urttasijt ja lastajt guohtu. Dálven le visste ájnnasamos biebbmo, muhttijn slahppo segadum dágŋasij ja gárránismuorjij. Dálvvejahkebielen le muhttijn aj pelletsij duoddebiebbmam. Sarvvájn (åres) ja váhtjamijn(niŋŋgelisboatsoj) li tjoarve. Boatsoj le mihtos bivvat rájgak guolgaj baktu, valla älla bivásrávtsá. Sálaj le biernnaj, gärkkáj ja albbasij.
Anedahkes judos
Histåvrå tjadá boatsoj le gidodimjuhtusin, noadejuhtusin ja gäsánin anoduvvam. Bivddám, dábmam, båhtjåm, bårråm li dav, ja skittes ja náhkes biktasijt gårrum. Suona hárppon båneduvátjis ja tjoale márffen dagáduvátji. Boahttsu tjoajve li vuorkkimlihtten anoduvvam.
Bierggo
Boatsojbierggo le livágis bierggo lidna miehttsejudos smáhkajn. Bierggo dávk baseduvásj, málestuvásj, sálltiduvásj ja gåjkkåduvásj. Boatsojbierggo le dimes ja ij dárbaha ruojvvima åvddåla gahtsahit.
Boahttsu vidjura
Sierratjärdda boahttsun le gå gårotdåjma ja biebbmodárbbo umasslágásj jahkeájgijn sierraláhkáj målssusi. Sjaddam, mielkke mässáj ja ietjas buojde ja proteijnnalijgij åvdedibme sjaddelis guohtomin giesen dáhpáduvvá. Dálven boatsoj álu viessu binná biebmujn ja loabddá ietjas buojdijt ja proteijnajt. Låsemus ájgge le gidádálvve ja gidá gå váhtjamij biebbmodárbbo lassán moarmesåvddånime ja njamádime diehti. Dalloj le guohtomnárre ja guohtomkvalitähtta vuollegasj.
Njoallomájgge ja ragátájgge
Váhtjama njoallomájgge le moarmesmánon, hieredis le áldoj vedjuj valla guhket miesij vuostasj guohtomájgev. Sarvvájda le ragátájgge gålgådismánon värámos ájgge gå buojdij ja proteijnaj ienemus oasse loabdeduvvá. Jus le garra dálvve ja sarvvá älla buojdde ja proteijnna åsijt tjaktjadálven ådåsis oadtjum de dávk jámadittji.
Tjuollde smieritjididdje
Boatsoj le nåv gåhtjuduvvam tjuollde smieritjiddje, mij rávkká biebbmuj alla kvalitehtav. Boahttsu fábmo vistev åmastit le sierralágásj. Boahttsuj visten le harmmat alla suddadahttem ja dajna biektelis biebbmo. Visten gávnnu binná proteijnna. Bierggitjit dálvev, buorre guohtomvidjurijn aj, boatsoj dárbaj ietjas proteijna lijgijt ávkkit. Båhtusav vaddá vaj gåroda diehkkonárre binnu dálven. Vistij vádne hähttu ietjá sjattoj målsuduvvat. Sjattoj binnep biektelis kvalitähtta dálven ráddji boahttsu ålles bårråmfámov. Ruoppsisgåddejuhtusijn li ráddjidum fámo sjattojt edna fiberij åmastit bv. slihturij ja sávtsaj guoran.
Visste
Visste sjaddá suojmma, bájken 10 prosännta jahkáj. Slahpo li vistijda duodden, sierraláhkáj tjuohkedálvijn. Lasedum miehttsetjuollam ja birásbiejstem li båhtusav vaddám vaj slahpo li miehtsijn binnum. Ilá edna boahttsu guohtomluohko gávttuj båhtusav vaddá vaj viste binnu. Vuoronis dávk båhtusav vattisj ednam ja biotopa ietjájduvvi ja ednam båråduvvá. Stuorra hásstálus boatsojäládussaj boahtteájgen le nuoges guohtomednama ja guohtomav tjuottjodit vaj biologalasj moattegärddásasjvuohta bisoduvvá.