Sámegiel podcast Supergielas
Supergiella lea Sámedikki nuoraidprošeakta man ulbmilin lea nannet sámegielaid stáhtusa, movttiidahttit nuoraid sámástit ja geavahit giela sosiála mediain. Prošeakta lea álgan golggotmanus 2022 ja bistá ovtta jagi. Prošeavttas lea dál mielde 8 nuora miehtá Ruoŧabeal Sámi ja sii hupmet lulli-, ubmi-, julev- ja davvisamegiela.
Sámi servodagas lea stuorrá dárbu sámegiel mediaide ja danin prošeavtta nuorat illudit go almmuhit ođđa Supergiella nammasaš nuoraid podcast-ráiddu ja vuosttaš episoda sotnabeaivve ođđajagimánu 22. beaivve.
Podcast-ráiddu lassin giellamovttiideaddjit bohtet dahkat sámegiel sisdoalu sosiála mediaide ja lágidit suohtas aktivitehtaid mánáide ja nuoraide. Supergiella lágida ovttas Sámi giellaguovddážiin mánáid giella- ja dáiddabargobáji Johkamohki márkaniid áigge.