Rievdadusat sámediggelágas
Kulturdepartemeanta lea evttohan rievdadit sámediggelága (1992:1433) mii meroštallá Sámediggeválggaid čađaheami. Evttohus čuovvu daid sávaldagaid maid Sámediggi lea leamaš ovdanbuktán.
Sámedikki válgalávdegoddi lea máŋgii gieđahallan jearaldaga got sámediggelága ja ođđa válgalága galggalii oktiiheivehit. Guovvamánu 2016 ovddidii stivra gáibádusa Kulturdepartementii.
Dál lea Kulturdepartemeanta válbmen nugohčoduvvon promemoria Ändringar i bestämmelser om val till Sametinget (DS 2017:34) mii sáddejuvvo gulaskuddamii ee. Sámediggái, Válgaeiseváldái, visot sámediggebellodagaide, máŋgga leanastivrii, gielddaide ja sámi organisašuvnnaide.
Evttohuvvon rievdadusat:
- Sihkkut stáhtalahttugáibádusa nu ahte leat seamma eavttut beassat leat válljevažžan go dan ahte jienastit (namalassii ahte leat leamaš čálihuvvon Ruoŧas maŋemus golbma jagi)
- Válljejeaddji guhte ii sáhte legitimašuvnnain duođaštit iežas identitehta válgalanjas galgá sáhttit dan dahkat iežaládje
- Sihkkut gildosa mii gieldá beallelačča dahje máná duođaštit reivejiena
- Válgalihput galget hábmejuvvot nu ahte persovdnaválljema mearkkašupmi boahtá ovdan
Muđui leat evttohuvvon gielalaš rievdadusat ja ahte sihkkut boares čujuhusaid ovddit válgaláhkii.
Gulaskuddanvástádusat galget leat Kulturdepartemeantta hálddus ovdal golggotmánu 2 beaivvi 2017. Gulaskuddanvástádusat galget sáddejuvvot ku.registrator@regeringskansliet.se
Láhkarievdadusat leat evttohuvvon fápmui boahtit suoidnemánu 1 b 2018, muhto dain dieđusge ii šatta praktihkalaš mearkkašupmi ovdal 2021 sámediggeválggaid.