Gievrras giellamodeallat dagahit guovttegielat mánáid, geat máhttet lohkat, čállit ja hupmat sihke sámegiela ja ruoŧagiela, ja geahnohis giellamodeallat mielddisbuktet ahte mánát eai šatta doaibmi guovttegielagin. Doahpagat gievrras ja geahnohis giellamodeallat leat dutki Colin Baker, Foundation of Bilingual Education and Bilingualism (2011) ráhkadan.
Gielladutkit leat fuomášan gievrras giellamodealla
– Servodat lea guhkit áiggi hábmen oahpahusa dan láhkái ahte mánát eai oahpa hupmat sámegiela. Mii leat gielaid oahpahan geahnohis modeallaiguin, muitala Romssa universitehta gielladutki Inga Lill Sigga Mikkelsen.
Giela árvu mearkkaša ollu. Jos giela atnet vealtameahttun oassi kultuvrras, de das lea diehttalas sadji ollisvuođas ja dasto galggašii leat buot fágain oahpahusgiella, dadjá Helssega universitehta gielladutki Annika Pasanen. Dalle lea vejolaš ahte dat ealáskahttojuvvo ja šaddá ealli giellan servodagas. Jos sámegiela baicce atnet objeaktan, dábálaš skuvlafágan, de das ii leat makkárge árvu, ii sámi servodagas ja iige eará servodagain. Giellaoahppamis ii šatta dan meare dássi ahte oahppit ohppet doaibmi giela.