Demokratiija vuoruheapmi
Sámediggi áigu ovttas Norrbottena gielddaiguin ja leanastivrrain čalmmustahttit ja nannet demokratiija.
Guovvamánu 18 beaivvi 2021 oassálasttii Sámediggi digitála seremoniijas mas máŋga Norrbottena leana ovddasteaddji vuolláičálle Deklaration för en stark demokrati/julggaštusa demokratiija nannema ovddas. Dat čadnojuvvo demokratiija 100-jagi ávvudeapmái mii lea 2021:s.
Čoahkkin dollui Norrbottena Leanastivrras gosa leanahearrá Lotta Finström, Luleju teknihkalaš universitehta, Region Norrbotten, Polardutkančállingoddi ja visot leana gielddat ledje mielde. Sámediggi oassálasttii čoahkkimis ja áigu vuolláičállit julggaštusa.
- Julggaštusa vuolláičállima bokte doarju Sámediggi demokratiija, olbmuid dásseárvvu ja vuđolaš friddjavuođaid ja vuoigatvuođaid, ja riektestáhta prinsihpaid, lohká stivraságadoalli Per-Olof Nutti.
Dát oktasaš áŋgiruššan čájeha ahte olles Norrbotten searválaga bargá demokráhtalaš prinsihpaid ovdánahttit ja nannet.
- Ruoŧa almmolaš bealli ferte ovttas iežá oasálaččaiguin doarjut ja veahkehit dán barggus, lohká leanahearrá Lotta Finström filmmas maid leanastivra lea ráhkadan vuolláičállima oktavuođas.
Filmma oainnát das: