Oahppomátki Singaporii
Davviriikkaid sámediggepresideanttat leat dál oahppomátkkis Singaporas. Norgga bealde oassálastá Vibeke Larsen, Suoma bealde Tiina Sanila-Aikio ja Ruoŧa bealde Håkan Jonsson.
Prográmma dán oahppomátkkis čađahuvvo ovttas iežá sámedikkiiguin. Singaporas galget sámediggepresideanttat ee. čoahkkinastit olgoriikkaministariin Vivian Balakrishnaniin ja ministtar Sam Tanain. Sam Tan lea ovdal fitnan Norgga Sámedikki guossis 2015:s ja čuovui maiddái Tråante-doaluid 2017. Singapore lea okta dain riikkain main lea observatevrastáhtus Árktalaš ráđis, nugo omd. maiddái Frankriikkas, Japánas, Kiinnás ja Duiskkas.
Oahppomátkki fáttát leat: mátkeealáhus, kulturárbbi suodjaleapmi, eananhálddašeapmi, máŋggakultuvrralaš politihkka ja almmolaš hálddašeapmi. Prográmma bistá 9 -17 gaskka juohke beaivvi (Ruoŧa ja Singapora áigegaska lea guhtta diimmu).
Váldde oktavuođa:
Håkan Jonsson, tel. +46 70-372 10 10