Sámediggi ja Sámi valáštallanlihttu gáibidit ruđaid sámi valáštallamii
Sámi valáštallama organisašuvdna ja doaibmaprofiila dagaha ahte Riikavaláštallanlihttu ii sáhte juolludit ruđaid Sámi valáštallanlihttui. Valáštallanlihtut mat leat čearddalašvuođa dahje oskku vuođul vuođđuduvvon eai dohkkehuvvo. Sámi valáštallanlihtus váilot maid dakkár searvedoaimmat ja gilvodoaimmat mat iežá sierralihtuin leat.
Dál gáibidit Sámediggi ja Sámi valáštallanlihttu sierra guhkilmas stáhtadoarjaga sámi valáštallamii mii galgá leat dárboárvvoštallojuvvon nu ahte sáme valáštallan sáhttá joatkašuvvat ja ovdánit. Ággan lea ahte sámit leat Ruoŧa áidna álgoálbmot ja sis lea dasa lassin riekti iešmearrideapmái.
Mii lea dasto sámi valáštallan? Sámi valáštallan lea ovdamearkka dihte njoarosteapmi ja boazovázziid gilvu mii ollát dahje mealgadii sulastahttá árbevirolaš eallinvuogi. 1948:s lágiduvvojedje vuohččan sámi čuoigangilvvut. Dan rájes leat báikkálaš sámisearvvit lágidan Sámi-SM sihke geasset ja dálvet jus lea leamaš ruđalaččat vejolaš. Maiddái spábbačiekčangilvvut ja iežá čuoigangilvvut leat leamaš dollojuvvon.
Sámi valáštallan lea mávssolaš dearvvašvuođa olis muhto maiddái sosiálalaččat ja kultuvrralaččat. Dat lea mánáid ja nuoraid sosialiserenarena, ja iešguđet guovllu sámiid deaivvadanbáikin. Valáštallan addá maid liibba deaivvadit iežá álbmogiiguin ja álgoálbmogiiguin jus leat cupat ja gilvvut riikkaidgaskasaččat.
Álgoálbmogiin leat sierra riikkaidgaskasaš gilvvut dego omd. Viva World Cup – mii lea vahkku guhkkosaš spábbačiekčangilvu daid regiovnnaid várás gos ii leat iešmearrideapmi, ja Arctic Winter Games gos fas cirkumpolára guovlluid álbmogat gilvvohallet iešguđet surggiin. Leat maiddái davviriikkalaš lágideamit elihtaaktiiva sámi nuoraide čuoigamis ja nieiddaid spábbačiekčamis. Conifa World Cup lea unnitloguálbmogiid spábbačiekčangilvu. Ruoŧa sámiin ii leat álo vejolašvuohta searvat dáidda doaluide, ja guhkkin eret lágidit daid, jus ránnáriika Norga ii fála ruhtaveahki.
Dát reive lea sáddejuvvon Sosiáladepartementii ja dan leaba vuolláičállán Sámedikki stivraságadoalli Håkan Jonsson ja Sámi Valáštallanlihtu jođiheaddji Ulrika Renström.