Sámij álmmukbiejvve
Sámij álmmukbiejvve guovvamáno 6. b. l aktisasj gájkka sámijda Svierigin, Vuonan, Suoman ja Gárjjelin.
Vuostasj sáme rijkkatjåhkanibme lij Tråanten guovvamáno 6. b. 1917. Tjåhkanimen lidjin badjel tjuohte sáme Svierigis ja Vuonas, ja ålos sijás lidjin nissuna. Lej vuostasj bále sáme histårjån gå nuortta- ja oarjjelsáme Vuonas ja Svierigis oassálasstin rájedis tjåhkanibmáj ságastalátjit aktisasj ássjij birra. Dan diehti l guovvamáno 6. b. válljidum ájnas gåvåstakbiejvven gájkka sámijda, vájku man rijkan sij årru.
1986 Nuorttarijkaj sámekonferänssa Ååren mierredij nammadit ”Sámi soga lávlla” almulasj sáme rijkalasjlávllagin. Täksta l tjáledum 1906 merrasámes Isak Saba (1875–1921) gut bargaj åhpadiddjen ja girkkotjuojadiddjen. Sån lij riegádam Unjárgan, Nuorttavuonan. Isak Saba lij vuostasj sábme gut válljiduváj Vuona Stuorradiggáj. Nuohtajt Arne Sørlie l tjállám.
22. sámekonferensan Váhtjerin 2022 Sámeráde mierredij nammadit "Sámieatnan duoddariid" rijkalasjjuojggusin sámij rijkalasjlávllaga buohta. Tjálle, tjuojadiddje ja dájddár Nils-Aslak "Áillohaš” Valkeapää tjálij juojggusav 1970-lågon. Juojggusin älla nuohta vaj máhttá dav hebadit umasse juojgosárbbedábijda Sámeednamin.
Ella-Sara giehttu:
Lågenanguokta sáme slávggábiejve:
- guovvamáno 6. b. - Sámij álmmukbiejvve
- sjnjuktjamáno 2. b. - Ådå Sámedigge Suoman rabáduváj sjnjuktjamáno 2. b. 1996
- sjnjuktjamáno 25. b. - Márjjebiejvve, árbbedábálasj sáme bassebiejvve
- Mihttsamárbiejvve
- bårggemáno 9. b. - FN:a rijkajgasskasasj álggoálmmugij biejvve
- bårggemáno 15. b. - Sámij slávggá dåhkiiduváj bårggemáno 15. b. 1986
- bårggemáno 18. b. - Sámeráde vuododuváj bårggemáno 18. b. 1956
- bårggemáno 26. b. - Sámedigge Svierigin rabáduváj bårggemáno 26. b. 1993
- gålgådismáno 9. b. - Sámedigge Vuonan rabáduváj gålgådismáno 9. b. 1989
- basádismáno 9. b. - Delegasjåvnnå sáme ássjij hárráj Suoman rabáduváj basádismáno 9. b. 1973
- basádismáno 15. b. - Isak Saba riegádimbiejvve
- basádismáno 29. b. - Elsa Laula Renberga riegádimbiejvve