Boazosámit vulget Almedalenii
Muhtun čearuin davvi-Ruoŧas leat ruvkedoaimmat duođas báhkkegoahtán hearkkes boazoguohtuneatnamiid nala. Danne vulget čearuid ovddasteaddjit Almedalvahkkui Visby gávpogii 29/6-5/7 2014.
Ruoŧa duottarguovlluin lea birasbillisteapmi lassánan sakka. Olgoriikkalaš ruvkeeksploatevrrat isket ja bovrejit eatnamiid gos jáhkket gávdnat ruovdemálmma vaikko omd Giebnegáissá – Sjaunja duottarguovlu lea suodjeguovlu Biraslága jelgii.
Sirges, Girjás ja Leaváš čearut áigot dál vuolgit Almedalenii ja čalmmustahttit ruvkedoaibmaáitagiid ja loktet ipmárdusa servodagas. Čearuid sápmelaččat áigot cegget lávu gasku Visby-gávpoga, ja juohkit dieđuid sápmelaččaid birra ja eareliiggánit boazodoalu birra.
Almedalenis galget leat logaldallamat mat ee gieđahallet bohcco ceavzineavttuid, sámiid juridihkalaš stáhtusa Ruoŧa servodagas, ja sápmelaččaid riektedili riikkaidgaskasaš perspektiivvas, Boazosámit áigot leat oidnosis olmmošvalvvi siste ja aktiivvalaččat searvat digaštallamiidda. Suoidnemánu 3. b lea seminára mas fáddán lea ”Sáhttágo ruvkkiid doaimmahit buohtalaga eananeaiggádiid ja iežá ealáhusaid doaimmaiguin, omd. boazodoaluin ja mátkeealáhusain?”
Ovttas Bevara Ojnareskogen- servviin lágiduvvojit kulturdoalut sámi artisttaiguin. Dát searvi geahččala vuosttaldit ođđa kálkaroggamiid Ojnarevuovddis Gotlánddas. Ojnarevuovdi lea Gotlándda stuorimus meahcceguovlu gos leat hui erenoamáš beazit, ja doppe lea maiddái Bästeträsk- jávri mii addá Gotlándalaččaide ráinnas juhkančázi. Rahčamušat suddjet dáid eatnamiid ja jávrri leat álgán 2005:s juo go Bevara Ojnareskogen searvi vuođđuduvvui.
Earet luonddu ja birrasa suodjalanrahčamušaid, de leat kálkaroggamis ja ruovdemálbmaroggamis maid iežá oktasaš bealit. Kálka adno bázahusávnnasteapmin ruovde- ja stálleráhkadeamis. Bázahusávnnas dárbbašuvvo dannego dat ráidne rišša ja fosforaid vuođđoávdnasis eret. Mađi eambbo ruovdemálmma rogget dađi eambbo kálkka dárbbašit.
Váldde oktavuođa:
Nila Inga, Leaváš čearu ságadoalli ja boazodoalli, 070-546 91 19
Matti Berg, Girjás čearu ságadoalli, mátkeealáhusdoalli ja sámediggeáirras, 070-663 31 28
Jakob Nygård, Sirges čearu ságadoalli ja boazodoalli, 070-398 65 89