Sámi čearddalaš dovddaldagat galget suddjejuvvot
Sámi čearddalaš dovddaldagaid lávdegoddi lea doallan čoahkkima Gironis borgemánu 27-28 beivviid 2018. Lea Sámiráđđi ja SPR mat leat vuođđudan lávdegotti.
Gironii ledje boahtán guhtta lávdegoddelahtu geat ovddastit sámedikkiid, Sámiráđi ja ruošša sámiid, namalassii Anders Kråik, Petra Magga Vars, Ol Johan Gaup, Thomas Åhrén ja Anna Sakmarkin, lahttu Lars-Anders Baer ii sáhttán boahtit. Lávdegoddi galgá ráhkadit njuolggadusaid got suodjalit sámi čearddalaš dovddaldagaid.
Leavgga galgá diehttelasat árvvusatnit seammaládje go iežá riikkaid leavggaid árvvusatnit.
- Dán čoahkkimis mii leat geahčadan lávdegotti bargogohččosa ja mii dat leat maid mii galgat bargat, muitala lávdegotti ságadoalli Anders Kråik. Min čearddalaš dovddaldagat nugo leavga ja sámi álbmotlávlla, leat gullevašvuođa symbolat ja daid ii galgga boastut geavahit.
- Mii leat maid ságastan ”álbmotluođi” birra ja áigut plánegoahtit got dainna bargguin joatkit, muitala Kråik.
Lávdegoddi ii leat dahkan makkárge mearrádusaid dán čoahkkimis Gironis muhto válbme áššiid boahtte čoahkkimii mii galgá dollojuvvot njukčamánus 2019.