Sámediggi ovttamielas ráđđehusain boazoguohtun- konvenšuvnna šiehtadallamiid ektui
Ráđđehus ja Sámediggi sohpe juovlamánu 6. b ahte dat boazoguohtunkonvenšuvdnaevttohus maid Ruoŧŧa ja Norga vuolláičálle 2010:s ii sáhte ratifiserejuvvot.
Gulaskuddamat leat čájehan ahte evttohus ii soaba daidda lágaide mat gusket čearuid siviila rivttiide. Garraseamos moaitámušat leat leamaš konvenšuvnna guovlluprotokolla ektui mas guohtuneatnamiid juohkin Norgga ja Ruoŧabealde lea čilgejuvvon.
Go ii leat gávdnon konvenšuvdna de lea 1751 jagi lappekodisilla mii lei stáhtaid gaskasaš rádjesoahpamuš, leamaš vuođđun Ruoŧa sámiid boazodoallorivttiid ektui Norggas. Muhto go lappekodisilla lea nu boares riektedokumeanta de lea dárbu oažžut sadjái njuolggadusaid mat heivejit dálá dillái ja mat čilgejit got lappekodisilla galgá čađahit.
Lea dárbu oktasaš njuolggadusaid vai eastadit riidduid mat sáhttet čuožžilit ja vai čoavdit čuolmmaid ee meahciealliáššiid, sisabahkkemiid ja eará heađuštemiid ektui, lohká Sámedikki stivraságadoalli Per-Olof Nutti.