Álgoálbmogat eai leat goasse ovdal lihkostuvvan nu bures ja viidát juridihkalaš vuogádagain go dál. Ja seammás eai leat álgoálbmogat goasse ovdal ođđaáiggis leamaš olgguštuvvon stuora našunálastáhtaid politihkalaš vuogádagain go dál.

Jus eat leat oassin čovdosis de šaddat oassin váttisvuođas celkkii Malcolm X dalle go son elii, ja dan guvlui lea maiddái álgoálbmogiiguin mannan sihke máilmmiviidosaččat ja maiddái gonagasriikkas Ruoŧas ja republihkas Suomas.

Sihke Ruoŧa ja Suoma stáhtat leat vuođđuduvvon eatnamiid nala maid sámi našuvdna lea geavahan ja gos sii leat ássan don doloža rájes. Viiddis duovdagat leat dál billistuvvon oalát, muhto goappaš našunálastáhtat viggaba beasadit álbmotrievttálaš geatnegasvuođain sápmelaš álgoálbmoga ektui.

Álgoálbmogat sáhttet dál dovdat oktiigullevašvuođa, vuoiŋŋalašvuođa ja doaivaga boahtteáigái  vaikko stáhtat ain barget sin vuostá garra lahkavuođuid bokte. Dan vuostálastima badjel sáhttit vuoitit máilmmiservodaga vehkiin ja dađimielde go duopmostuolut ovdánit dan guvlui ahte dovddastišgohtet álgoálbmogiid ja sin rievtti eallit iežaset eatnamiin iežaset dáhtu mielde.

Mii gávnnadit ovddemusas! Das leat don nai mielde go čuoččuhat iežat kultuvrra iežat árbevirolaš eatnamiin ja čáziin, go lávllut sámegillii dahje juoiggat, dahje go manifesteret álgoálbmogiid njulgosiid Sámedikki almmolaš rahpandilálašvuođas Staares borgemánu loahpageahčen.

Máilmmis ii gávdno nu sevdnjes čuovggahisvuohta ahte nagoda jáddadit visot gintaliid. Odne buollá ginttalčuovga máilmmi álgoálbmogiid várás!
 

Stefan Mikaelsson
Sámedikke åvddåulmusj – Sámedikki ságadoalli

tel. 070-223 34 62