Sámedikki dásseárvoprográmma ulbmilat:
"Sámenissoniin ja dievdduin leat seamma vuoigatvuođat, vejolašvuođat ja geatnegasvuođat buot eallinsurggiin. Dát guoská iežas bargui ja birgejupmái, váikkuhanvejolašvuhtii servodagas, ruovttu ja mánáid dikšumii ja hálddašit iežas rupmaša. Sihke sámi nissoniidda ja dievdduide, nieiddaide ja bártniide lea vejolašvuođat válljet beroškeahttá sohkabeali ".
Vejolašvuođat, vuoigatvuođat ja geatnegasvuođat
Dásseárvu lea das ahte nissoniin ja dievdduin, nieiddain ja bártniin galget leat seamma vejolašvuođat, vuoigatvuođat ja geatnegasvuođat. Dat bargu maid nissonat ja dievddut barget adnojuvvojit seamma árvosažžan servodagas.
Dievdduid ja nissoniid bargguid atnit árvvus
Dásseárvu lea soapmásiid mielas ahte nissoniid barggu atnet seamma árvosažžan go dievdduid barggu. Dalle lea servodagas dásseárvu. Dán definišuvnna mielde ii lean sámi árbevirolaš servodagas dásseárvu, go ”dievdduid” bargguin lei eanet árvu. Dasto ii leat doarvái ahte nisson bargguin lea alla árvu.
Hehttehusat sohkabeali geažil
Stuorámus váttisvuohta čuožžila jos nissonolbmot ja dievddut eai beasa doaibmat olggobeale iežaset sohkabeali rájiid. Dalle ii leat doarvái atnit árvvus nissoniid barggu vaikko dat lea dehálaš oassi, dasto ferte bearráigeahččat ahte ovttaskas olbmot eai hehttejuvvo iežaset sohkabeali geažil.
Dássálas sohkabealjuohku
Dássálasvuohta lea dávjá vuođđuduvvon ovddasteapmái. Dat sáhttá leat gáržžes oaidninsadji. Ovddasteapmi ii leat iešalddis doarvái ahte sáhttá dadjat ahte lea dásseárvu. Lea maid dehálaš geahčadit geas lea váldi (sihke formálalaš ja eahpeformálalaš), makkár áššit váldojit ovdán ja vuoruhuvvojit, geat besset ovdanbuktit iežaset oaiviliid ja nu ain.
Got din searvvis/organisašuvnnas lea dilli?