Sámi kulturduovdagat leat ollusiidda amas guovllut vaikko dat leat oba viidát davvi-Ruoŧas. Dávjá gohčoduvvojit ávdin guovlun vaikko dáppe leat hui olu bázahusat olbmuin geat leat eallán ja birgen čuđiid miel jagiid boazodoalus. Sámi kulturbázahusat leat čoahkkenamahussan sámi eallinvuogis nugo orrumis, johtimis jna. dološ áiggiid čađa dássožii ja muđui luottat maid sihke olbmot ja eallit leat guođđán.

Sámi álbmogii lea dehálaš čalmmustahttit, bisuhit ja vára váldit kulturbirrasiin. Doarjja veahkeha divodit ja ođastit sámi ássanbirrasiid nu ahte šaddet fas dakkárin govt álggos ledje, vai seailluhit sámi huksenvieruid boahtte bulvii ja vai dat ellet viidáseappot. Ná sáhttá maid juohkit dieđuid sámi eallima birra ja govt mii leat geavahan guovlluid ovdal ja dál.

Doarjja galgá veahkehit divvut dehe ođastit dološ visttiid ja gárddiid mat leat geavahuvvon orruma várás ja boazobarggus ovdal 1960. Visttiide sáhttá oažžut doarjaga jus dat leat árbevirolaš visttit, áittit ja iežá visttit mat leat adnon ealibiid váste dehe guolástandárbbuide, ja main dáhkit, vuođut, seainnit ja láhtit fertejit divoduvvot. Gárddiide sáhttá oažžut doarjaga jus leat árbevirolaččat leamaš geavahuvvon ja jus daid leat lunddolaš ávdnasiin dahkan boazobarggu várás. Doarjja ii addo dábálaš máŧasdoallandárbbuide.

Visttit ja gárddit galget álggu rájes leamaš ceggejuvvon sámi huksenvieruid mielde, ja galget divoduvvot seamme vugiiguin. Investeren galgá leat ollislaš čoavddusin sámi visttit ja ássanbirrasiid ođasmahttimin.

FUOMÁŠ! Doarjja juolluduvvo 90 proseantta rádjái dohkkehuvvon goluide, gitta 250 000 kruvdnui  juohke prošektii. Doarjja ii juolluduvvo ohcamušaide main olggosgolut leat unnit go 30 000 kruvnno.

Dán doarjaga birra eai leat dieđut Eanandoallodoaimmahaga ruovttusiiddus. Váldde oktavuođa Sámedikkiin jus dárbbašat eanet dieđuid.

Ohcamuš galgá čállojuvvot Eanandoallodoaimmahaga e-bálvalusa bakte.