Sámediggi lea ožžon cavgileami ahte Systembolaget lea vuovdigoahtán viidnesortta mas lea namma maid sámit  atnet unohassan ja heivemeahttumin. Media lea maid moaitán dán ja olbmot leat váidán Systembolageta  vealahanáittardeaddjái.

Olu stuora fitnodagat leat álgán fuomášit ahte sin doaimmain sáhttá leat váikkuhus ee. álgoálbmogiidda, muhto eai buohkat muitte ahte Ruoŧas lea maid iežas álgoálbmot man ferte vuhtiiváldit. Dál galgá Sámedikki várreságadoalli Josefina Skerk deaivvadit Systembolageta ossodathoavddain Lena Rågein ságastallat CSR-barggu birra.

CSR mearkkaša Corporate Social Responsibility ja dainna oaivvilduvvo ahte ođđaáigásaš fitnodagat galget maiddái váldit sosiála ovddasvástádusa. Dál leat stuorit vuordámušat fitnodagaide das ahte vuhtiiváldet olmmošvuoigatvuođaid, vuđolaš bargoriekteprinsihpaid ja vuđolaš birasdásiid vaikko gos leat máilmmis.

Manne lea ”Lapland Jojk” unohas namma mii čájeha badjelgeahččanvuođa? Juo danne go sámiid árbevirolaš lávlunmálle, juoigan lea historjjálaččat leamaš gildojuvvon ja sivahallon suddudeapmin. Iežát go sámit leat áiggiid čađa leamaš čatnan dan jugešvuhtii ja heivemeahttumis láhttemii.

Dál lea juoigan fas ealáskan. Dat lea mávssolaš oassi sámi kultuvrras ja lea  erenoamáš musihkkariggodat mii maid gullá ođđa áiggi pop-kultuvrii ja man artisttat omd. Sofia Jannok Jon-Henrik Fjellgren doalaheaba eallin. Juoigan ovdanbuktá dovdduid ja čilge máilmmi – ja dan ii galgga čatnat viidnesorttaide.

Váldde oktavuođa:
Josefina Lundgren Skerk
Sadjásaš stivraságadoalli
070-582 21 21