Giellakonferánsa sámi mánáid giellageavaheami birra
Juovlamánus lágida Sámedikki giellaguovddáš ja unnitlogugielaid gieđahalli Liksjoe gielddas giellakonferánssa mas mánáid giellageavaheapmi lea guovddážis. Giellaguovddáš máksá váhnemiid oassálastima.
Sylvia Sparrock gii lea bargojođiheaddji Sámi giellaguovddážis muitala ahte okta váldoulbmiljoavku dán konferánsii leat sámi mánáid váhnemat.
- Dán háve háledit mii addit sámi mánáid váhnemiidda máŧolašvuođa oassálastit sámi giellakonferánssas, Mii fertet ovttas hábmet strategiijaid govt min mánáid giellarievttit galget ollašuvvat ja mii fertet geahččalit muktit servodaga oainnuid, lohká son.
Konferánsa lea maid eatnigiellaoahpaheddjiid, gielddaid sámi buohtalastiid, boahttevaš sámegieloahpaheddjiid, ovdaskuvlahoavddaid, skuvlahoavddaid, rektoriid, Sámeskuvlastivrra, Sámedikki giellalávdegotti, Sáminuorra organisašuvnna, Ubmeje universitehta, Skuvladoaimmahaga ja iešguđet departemeanttaid virgeolbmuid várás.
Konferánssa ulbmil lea ovttas digaštallat sámi mánáid eavttuid doalahit ja ovddidit sámegiela beaivválaš giellan ruoŧagielat servodagas. Konferánssas geahččalit konkretiseret dárbbuid ja reaidduid sámegieloahpahusa várás vai gielddat ja váhnemat sáhttet nannet mánáid giellaoahpahusa. Mánáide geain ii leat sámegiella ruovttugiellan lea stuora hástalussan šaddat guovttegielagin. Sáhttá leat váttis oažžut sámi ovdaskuvlafálaldaga dehe eatnigieloahpahusa skuvllas. Ollugat muitalit man váivi lea oaidnit ahte ovdaskuvla ja skuvla ii atte mánáide giela.
Okta váhnemiin guhte logaldallá lea Vaino Persson. Son lea positiiva ovdagovvan go olles su veahka njeljiin mánáin leat guovttegielagat vaikko eai oro sámi giellabirrasis. Sin lagasbirrasis lea ruoŧagiella vuoittu bealde, muhto ruovttus ságastit dušše oarjánsámegiela. Govt sii leat lihkostuvvan? Maiddái sámi nuorat, eatnigielaoahpaheaddjit ja unnitlogugiellagieđahallit muitalit iežaset vásáhusaid sihke lihkostuvvamiin ja hástalusain.
Sámi giellaguovddáš máksá váhnemiid oassálastindivada ja mátkegoluid (fertejit de mátkkoštit fárrolaga). Gielddat ja ásahusat gal fertejit ieža máksit goluid.
- Govt de lehpet jurddašan, Sylvia Sparrock, Giellaguovddáža bargojođiheaddji?
- Váhnemiin ii leat organisašuvdna mii sin ovddasta eai ge soaitte leat fierpmádagat mat vuojehit sin áššiid mánáid ja skuvllaid giellaáššiid ektui. Ollugat čohkkájit ákto iešguđet gielddas eai ge dovdda ahte ožžot doarjaga dehe ipmárdusa iežaset rivttiid ovddas. Mii leat ožžon sávaldaga lágidit dákkár foruma ja dál dahkat nu! Danin sávvat ahte buohkat geaidda guoská bohtet konferánsii. Bures boahtin Liksjoei juovlamánu 16-17 b 2015!