Mátkeealáhus- ja vuoiŋŋastandoaimmat
Ulbmil doarjagiin lea buoridit vejolašvuođaid álggahit vuoiŋŋastandoaimmaid olbmuide. Doarjja galgá maid buoridit mátkeealáhusvejolašvuođaid min guovlluin. Dás sáhtát lohkat doarjaga birra. Dárkilet dieđuid gávnnat Eanandoallodoaimmahaga ruovttusiiddus.
Organiserejuvvon sámi mátkedoaibma lea oalle ođđa sámi ealáhus vaikko ovttaskas sámit leat guhká bargan turismmain. Álggos lei sámi mátkedoaibma dábálaččat ofelastin duoddariin, muhto dálá sámi mátkefitnodatdoallit deattuhit diehtojuohkima sámiid ja sámi kultuvrra birra go fállet bálvalusaideaset. Lea hirbmat ávkkálaš juohkit dieđuid sámi kultuvrra ja eallinvuogi birra lunddolaš birrasis. Sámi guovlluin leat olu bázahusat mat muitalit ahte sámi leat dáppe eallán oba guhká. Go dáid báikkiid čalmmustahttá eanet olbmuide de dat veahkeha loktet dieđuid sámiid ja sámi kultuvrra birra.
Sámediggi vuoruha investeremiid siskkáldasstruktuvrras mat ovdánahttet mátkeealáhusa sámi perspektiivva vuođul vai sámi kultuvra ja ealáhusat fuomášuvvojit ja vai sámi kultureatnamat váldojuvvojit vuhtii birasgáhttejeaddji vuogi mielde. Sámediggi vuoruha turistadiehtojuohkima mii čájeha ja muitala sámi historjjá, kultuvrra ja ealáhusaid birra lunddolaš oassin guovllus.