Unnitlogupolitihkka unnán ovdánan 2014:s
Stockholmma leana leanastivra ja Sámediggi galgaba jahkásaččat čuovvolit lága našuvnnalaš unnitloguid rivttiid birra. Jahkásaš raporta mii dál sáddejuvvo ráđđehussii muitala ahte bargu dán suorggis lea unnán ovdánan vássán jagis.
Ođđajagimánu 2010 rájes lea Stockholmma leanastivrras ja Sámedikkis leamaš váldoovddasvástádus oktiiheivehit ja čuovvolit Ruoŧa unnitlogupolitihka. Jahkásaš raporta mii dál geigejuvvo ráđđehussii čájeha ahte bargu našuvnnalaš unnitlogu vuoigatvuođaiguin lea ovdánan buorebu guvlui unnitlogugielaid hálddašanguovlluin dan rájes go reforbma álggii 2010:s.
Nubbi positiiva bealli lea ahte stáhtaeiseválddiid máhttu unnitlogupolitihka ja našuvnnalaš unnitloguid rivttiid birra orru buorráneame. Muhto ovdáneapmi manná hiitásit čájeha raporta. Gielddaid rahčamušat hálddašanguovlluin leat sullii seamme dásis go dat maid Leanastivra ja Sámediggi raporterejedje 2013, ja muhtun guovlluin leat maŋos nai mannan.
–Stuorimuš vejolašvuohta oažžut unnitlogupolitihkalaš rivttiidat čađahuvvot lea jus orut dakkár gielddas mii oažžu stáhtadoarjaga hálddašangieldan, muhto dain gielddainja eanandikkiin mat leat hálddašanguovllu olggobealde ii leat unnitlogupolitihkka doarvái bures ovdánan, lohká Helena Cronséll, Leanastivrra bargomárkan- ja riekteossodaga ovdánahttinjođiheaddji.
Lágas leat váilevašvuođat mat dagahit ahte eat olat daid bohtosiid maid sávaimet olahit unnitlogupolitihkain. Danne evttohuvvo ahte láhka galggalii leat eanet dárkil.
–Mii leat dakkár dilis dál ahte livččii dárbbašlaš lágas defineret mii lea unnimus dohkálaš mearri gielddaid unnitlogugiellafálaldagas ovdaskuvlaoahpu ja boarrásiiddivššu ektui, lohká Marie Louise Allas.
Raporttas evttohuvvo maid ahte Skuvladoaimmahat galgá nannet našuvnnalaš unnitlogugielaid oahpaheaddjedili, ja buvttadit eanet oahpponeavvuid visot našuvnnalaš unnitlogugielaide.
–Láhka našuvnnalaš unnitloguid rivttiid birra lea dál doaibman vihtta jagi, muhto mii oaidnit ain ahte máŋgga guovllus manná lága duohtandahkan njozet. Ruoŧŧa ferte buorebut bargagoahtit daiguin áššiiguin, lohká Helena Cronséll.
Oktavuohta:
Marie Louise Allas, Sámedikki ossodathoavda
marielouise.allas@sametinget.se
Tel: 0980-681 93, 070-367 46 82
Helena Cronséll, Stockholmma Leanastivrra ovdánahttinjođiheaddji
helena.cronsell@lansstyrelsen.se
Tel: 010-223 15 17
