Sámedikki giellabargu
Okta Sámedikki láhkamearriduvvon doaimmain lea jođihit sámi giellabarggu. Bargu lea organiserejuvvon giellaossodahkii mii doaibmá ráđđeaddin ja áššedovdin, ja Sámi giellaguovddážii mas lea ovttasvástádus bargat olggosguvlui ja giela ealáskahttimiin.
Giellaossodaga bargu
Stuora oassi giellakonsuleanttaid barggus giellaossodagas lea sátne- ja gramatihkkadikšun. Sii gieđahallet giellaáššiid ja vástidit jearaldagaid olbmuin. Lea maid olu diehtojuohkinbargu giellalága ja iežá giellaáššiid birra. Bistevaš bargui gullo maiddái ráđđeaddin, siskkáldas jorgaleapmi, korrektuvralohkan, diehtoohcan ja dutkan ja maiddái báikenamaid dárkkisteapmi ja ođastuhttin . Sámediggi veahkeha dulkon- ja jorgalangaskkustemiin eiseválddiide ja earáide go lea dárbu.
Báikenammaráđđi
Sámedikkis lea ovddastus Báikenammaráđis. Bargojoavku ásahuvvui 2006 Sámedikkis, SOFI:s ja DAUM:as bargogohččosiin ahte hábmet váldolinjjáid ovttasdoaimmaide sámi báikenammabargui, mearridit bargomálle ja cegget njuolggadusaid sámi báikenamaid dárkkisteami várás.
Unnitlogugiellaláhka
Sámegiella lea almmolaččat dohkkehuvvon Davviriikkain sámi giellalágaid ásaheami bakte. Cuoŋománu 1 b.2000 dohkkehuvvui sámegiella (visot variánttat) almmolaš unnitlogugiellan Ruoŧas. Ođđa láhka našuvnnalaš unnitloguid ja unnitlogugielaid birra lea leamaš fámus ođđajagimáni 1 b. 2010 rájes. Sámegiela hálddašanguvlui gullet 22 gieldda davvi-Ruoŧas.