Sisriikkalaš ja riikkaidgaskasaš sámi giellavahkku 2021
Sámi giellavahkku lágiduvvo dál goalmmát geardde, ja lea šaddan fiinna jahkásaš vuohkin čalmmustahttit sámegielaid. Sámi giellavahkku lea oktasaš áŋgiruššan man ulbmil lea oainnusin dahkat sámegielaid, ja lea ovttasbargu Norgga, Ruoŧa ja Suoma sámedikkiid gaskka.
- Dán vahkku galget min sámegielat oidnot ja gullot servodagas. Mii leat hui rámis daid olu iešguđetge doaimmaiguin mat lágiduvvojit miehtá riikka, dadjá sámediggepresideanta Silje Karine Muotka.
Son lasiha ahte son lea erenoamáš ilus go aktevrrat nu go Avinor, Tine, Freia, Wideroe ja Cirkel K leat mielde čalmmustahttime sámegielaid iešguđetge lávddiin.
- Mun lean hui ilus go stuorát aktevrrat mannet ovdalis, gállet luotta ja čalmmustahttet sámegielaid almmolašvuođas, dadjá sámediggepresideanta Silje Karine Muotka.
Sámi giellavahkku lea sturron jagis jahkái, ja sihke suohkanat, sámi ásahusat, báikkálaš ja našuvnnalaš aktevrrat ja priváhtaolbmot leat mielde čalmmustahttime sámegielaid dán vahkku.
- Giellavahkku lea šaddan bistevaš árbevierrun, ja dat lea dehálaš čalmmusteapmi sámegielaid hárrái. Vaikko guđe máhttodásis leažžat, de čatnet giela min oktii ja ráhkadit čanastagaid min gaskii, dadjá Håkan Jonsson, gii lea Ruoŧa Sámedikki stivraságadoalli.
- Giellavahkku addá erenoamáš vejolašvuođa čalmmustahttit sámegielaid, ja mun sávan ahte maiddái Davviriikkaid eiseválddit ja aktevrrat geavahišgohtet sámegielaid heivvolaš vugiin iežaset doaimmain giellavahkku oktavuođas, dadjá sámediggepresideanta Tuomas Aslak Juuso.
