Dál bargá Österling hoavdan Helsingborgga Konseartaviesus ja Symfoniorkesteris. Son lea máŋggaid jagiid bargan hoavdavirggiin musihkkamáilmmis, ja lea leamaš guorahallin Gonagaslaš Operas ja Dáiddárlávdegottis. Gaskal 2004-2006 barggai Fredrik Österling guorahallin Kulturdepartemeanttas.

Dál álgá ođđa hástalus – namalassii ovdánahttit Sámedikki. 2019:s geigii Helsingborg gávpot Österlingii ja symfoniorkesterii bálkkašumi go lea ”fanahallan rájiid das got kultuvra sáhttá oassálastit ja jođihit servodatdigaštallama seailovašvuođaáššiin”. Juste dálkkádat ja seailovašvuohta leat dakkár áššit main Fredrik berošta. Seammá son sáhttá fanahallat maiddái Sámedikki rájiid?

Fredika lohket geabbilis, doaimmalaš ja fuolalaš jođiheaddjin. Vaikko son lea nu guhká bargan musihkain, de atná son ávvira iežas sámi duogážis.

- Lea olu ja dehálaš áššit maiguin bargagoađán – historjá bidjá stuora gáibádusaid. Hálddahushoavdan lea deháleamos ámmát maid goassege lean váldán, maiddái daningo sámi servodatáššit gusket čiekŋalit munnje persovnnalaš dásis, čilge Fredrik Österling.

Sámediggi lea viiddis ja máŋggabealat doaibma mas leat sullii 50 bargi, ja dasa lassin sierra politihkalaš orgánat. Stivraságadoalli Per-Olof Nutti lea duhtavaš rekrutteremiin. Sámedikki stivra lea ovttamielalaččat mearridan virgádit Fredrik Österling dehálaš hálddahushoavdavirgái.

- Mii jáhkkit ahte Fredrik Österling sáhttá buktit min doibmii ođđa perspektiivvaid, lohká stivraságadoalli Per-Olof Nutti. Mii sávvat sutnje buresboahtima Sámediggái ja Sápmái, ja sávvat buori ovttasbarggu sihke politihkkáriiguin ja hálddahusbargiiguin!

Fredrik fárre Skånes Gironii geasset ja son álgá virgái borgemánu 1 beaivvi 2021.

Váldde oktavuođa

Per-Olof Nutti, stivraságadoalli
Tel. 070-376 31 12

Fredrik Österling, ođđa hálddahushoavda
Tel. 070-569 17 65