Leat bures juo jođus sámi duohtavuođakommišuvnna sajáidahttimiin sámi álbmogis. Leat ásahan stivrenjoavkku mas leat čieža lahtu, ja maiddái virgádan prošeaktajođiheaddji. Dasto lea maid nammaduvvon vásedin referánsajoavku.

Dattege lea korona-dávdda dihte leamaš váttis doallat fysalaš čoahkkimiid Sámis nugo álggos lei áigumuš. Leat šaddan šluhttet máŋga čoahkkima dahje baicca doallat digitála čoahkkimiid. Dađibahábui šaddá oallugiidda de váttis searvat ságastallamiidda.

Sámedikki stivrenjoavku dán prošeavttas lea danin mearridan ahte lassin dialogačoahkkimiidda de galget olbmot beassat buktit oaiviliid čálalaččat jearahallanskovi bokte. Dáid beivviid sáddet mii sámi álbmogii diehtojuohkingihppaga mas lea liŋka jearahallanskovvái. Mii geahččalit olahit nu oallugiid go sáhttit sierra kanálaid bokte, ee. sámi jienastuslogu, sámi servviid, sámi organisašuvnnaid ja sámediggebellodagaid miellahtuid bokte.

- Mii áinnas háliidit oažžut nu olu oaiviliid ja evttohusaid ovdan go vejolaš das ahte makkár fáttáid duohtavuođakommišuvdna galggašii gieđahallat, lohká Matti Blind Berg gii lea stivrenjoavkku jođiheaddji.

Sámediggi lea gáibidan guhkidit prošeaktaloahppameari miessemánu 31 beaivái 2021, dainna ákkain ahte ii leat sáhttán doallat daid álbmotčoahkkimiid/gulaskuddančoahkkimiid maid lei áigon, ja go jearahallanskoviid vástádusaid ádjána čohkket. Sámedikkis lea buorre doaivva oažžut ráđđehusas lobi maŋidit prošeaktaáigemeari korona-dávdda hehttehusaid dihte.

- Duohtavuođakommišuvnna ásaheami proseassa lea dál ollen guhkás, ja lea dehálaš ahte sámi álbmot beassá ovdanbuktit iežas oainnu ovdalgo kommišuvdna ásahuvvo, lohká Håkan Jonsson gii lei mielde barggu álggaheamis 2015:s. 2016:s dollui Ubmejes rabas seminára mas ledje mielde riikkaidgaskasaš áššedovdit. Doppe besse sámit gullat olggobeal áššečehpiid vásáhusaid ja oaiviliid mii attii buori vuođu dán bargui. Daid logaldallamiid lea vejolaš geahččat Sámedikki ruovttusiiddus, ja doppe leat maid eanet duogášdieđut jus lea beroštupmi eambbo lohkat.

Stivrenjoavku jáhkká ahte olu sámit Ruoŧas leat vuordán ahte duohtavuođakommišuvdna galggalii ásahuvvot. Lea hui olu diehtemeahttunvuohta sámiid diliid birra, ja leat olu dehálaš áššit maid lea dárbu čuvget. Dál sávvá stivrenjoavku ahte oallugat searvvale ja buvttále evttohusaid fáttáide maiguin duohtavuođakommišuvdna galggalii bargat.

Eanet dieđut: https://www.sametinget.se/sanningskommission

Stivrenjoavkku lahtuid oktavuođadieđut:

Matti Blind Berg, tel. 070-397 69 77
Håkan Jonsson, tel. 070-372 10 10
Marie Persson Njajta, tel. 073-806 98 48
Jan Rannerud, tel. 070-600 80 76
Anders Kråik, tel. 070-224 71 61
Joakim Påve, tel. 070-229 71 57
Marita Stinnerbom, tel. 070-399 98 06

Prošeaktajođiheaddji oktavuođadieđut:

Marie Enoksson, tel. 070-310 09 94 (beaivet), marie.enoksson@sametinget.se