Dievasčoahkkin Árviesjávrries koronaráddjejumiiguin
Skábmamánu 24-27 beivviid lágiduvvo fysalaš dievasčoahkkin Árviesjávrries. Dát lea politihkalaččat hui dehálaš dievasčoahkkin daningo Sámedikkis lea jođus bušeahttaproseassa. Čoahkkimis šaddet čuovvut olu njoammuneastadan-rávvagiid.
Sámedikki čoahkkinjođihangoddi lea doalahan oktavuođa Norrbottena njoammunsuodjedoaktáriin, ja lea maiddái gulahallan Sámedikki bellodatjođiheddjiiguin. Dan maŋŋel lea čoahkkinjođihangoddi mearridan čađahit dievasčoahkkima plána mielde. Danin šaddá fysalaš dievasčoahkkin Árviesjávrries skábmamánu 24-27 beivviid.
Dievasčoahkkin lágiduvvo Hotel Laponias gos leat olu korona-eastadan ráddjejumiid vai dievasčoahkkinlahtuide galgá leat sihkkaris dilli. Dát čoahkkin lea dehálaš daningo Sámedikkis lea juste dál bušeahttaproseassa jođus. Lea maiddái váttis maŋidit dievasčoahkkima, eareliiggánit go miessemánu dievasčoahkkin ii šaddan lágiduvvot. Dasto eai leat Sámedikkis vuos nohkka buorit digitála rusttegat maiguin doalašii dohkálaš dievasčoahkkima riektesihkarvuođa ektui.
- Mun ipmirdan dan balu maid oallugat dovdet in ge váldde geahppasit dan, muhto seammás dovddan ovddasvástádusa Sámedikki doaimmas. Go Region Norrbottena njoammunsuodjedoaktárat mieđihit, de jáhkán ahte mii ovttas nagodit čađahit dievasčoahkkima sihkkaris vuogi mielde go leat várrogasat, lohká Sámedikki ságadoalli Paulus Kuoljok.
- Bellodatjođiheddjiin lea leamaš dáhttu ovttas gávnnahit čovdosiid. Ovttaskas lahtuin lea stuora ovddasvástádus čuovvut daid njoammuneastadanrávvagiid mat leat, doallat gaskka, ja jus veaháge dovdá nuorvvu de ii galgga boahtit. Mii áigut maiddái čoahkkinbevddiid stellet iežaládje go dan masa leat hárjánan.