4 miljovnna kr korona-doarjjan sámi kultuvrii
Sámediggi oažžu 4 miljovnna mii galgá geavahuvvot sámi kulturulbmiliidda. Dat lea oassin dan beannot miljárddas maid ráđđehus lea juolludan kultursuorgái koronadávdda váikkuhusaid ovddas.
Kulturdepartemeantta preassadieđáhusas boahtá ovdan ahte Stáhta kulturráđđi oažžu 881 miljovnna kr maid galgá juohkit kulturaktevrraide. Filbmainstituhtta galgá juolludit 375 miljovnna. Girječálliidfoanda galgá juohkit 30 miljovnna. Ja Sámediggi oažžu 4 miljovnna kr maid galgá juolludit sámi kulturulbmiliidda doarjjan.
Cuoŋománu 22 beaivvi 2020 gáibidii Sámediggi ráđđehusas liigedoarjaga sámi kulturdoaimmaide koronadávdda geažil. Sámediggi cuiggodii ahte sámi kulturdoaimmain leat ilá smávva resurssat nagodit dustet daid ekonomalaš heđiid maid koronadávda dagaha, namalassii go sisaboađut unnot. Dán lea ráđđehus vuhtiiváldán, ja dán hqve leat juolludan heahtedoarjaga sámi kultuvrii maid.
Doarjjamáksinaktevrrat addet dárkilet dieđuid doarjagiid birra dađistaga go dat čilget. Earet dán de lea ráđđehus evttohan boahtte jagi bušeahttaproposišuvnnas movttiidahttin-miljárdda kultursuorgái mainna kultursuorgi galgá ođđasis ealáskit ja vuolggahit kulturdoaimmaid boahtte jahkái.