Ráđđehus dáhttu doaibmaprográmmain suddjet sámi gielaid
Ráđđehus lea dál gohččon Sámedikki válbmet guhkilmas doaibmaprográmma sámi gielaid suddjema várás.
Ráđđehus lea dál gohččon Sámedikki válbmet evttohusa guhkilmas doaibmaprográmmii sámi gielaid suddjema várás.
- Olbmo identitehtii ja árgabeaidillái lea iežas giela beassat geavahit áibbas guovddážis. Mii fertet sihkkarastit sámi gielaid seailluheami. Danin lean ilus go dál gohččut Sámedikki ráhkadit doaibmaprográmmaevttohusa. Ealli giela haga jávohuvvet olbmot ja sin muitalusat. Nu eat galgga diktit geavvat, lohká kultur- ja demokratiijaministtar Amanda Lind preassadieđáhusas.
Doaibmaprográmma ráhkadeami oktavuođas galgá Sámediggi ságastit, ráđđádallat ja viežžat dieđuid sierra organisašuvnnain, ee. sámi siviila servodaga organisašuvnnain, Giella- ja álbmotmuitoinstituhtas, Stockholmma leana leanastivrras, Stáhta kulturráđis, Universitehta- ja allaskuvlaráđis, Sámeskuvlastivrras, oahppoásahusain gos lea sámegiella, ja Ruoŧa gielddain ja eanadikkiin.
Bargu galgá ovdanbuktot Ráđđehushálddahussii ovdal geassemánu 17 beaivvi 2020.