Gáibádus vuolláičállit ILO 169
Sámedikki dievasčoahkkin gáibida ráđđehusa evttohit riikkabeaivái ahte jođánit ratifiseret ILO-konvenšuvnna 169 vai sámiid riekti eatnamiidda ja čáziide árbevirolaš geavaheami bokte, sáhttá sihkkarastot ja suddjejuvvot. Sámediggi atná ahte ILO 169 fátmmasta visot sápmelaččaid.
Gáibádusas mii ovddiduvvui geassemánu 14 beaivvi 2019 dáhttu Sámediggi čielga áigeplána dán ratifiseremii, ja ahte ráđđehus váldá sámi álbmoga mielde ratifiserenprosessii.
Sámediggi lea 1999:s juo dievasčoahkkimis ovttajienalaččat cealkán ahte Ruoŧŧa galgá farggamusat ratifiseret ILO 169, ja ahte sámi álgoálbmot fátmmastuvvo olmmošvuoigatvuođain riikkaidgaskasaš konvenšuvnnaid jelgii. ILO-konvenšuvnna vuolláičállin addá buoret vejolašvuođaid vuođđosuodjái, ja dasa ahte sápmelaččaid sámi boahtteáigi Ruoŧas nannejuvvo.
Guorahallamis Samerna - ett ursprungsfolk i Sverige (SOU 1999:25) bođii ovdan ahte Ruoŧŧa mealgadii deavdá konvenšuvnna gáibádusaid, muhto ahte muhtun doaimmat fertejit álggahuvvot vai Ruoŧŧa ollašuhttá gáibádusaid sámiid eananvuoigatvuođaid ektui. Dan maŋŋel leat vel guokte stáhtalaš guorahallama dahkkon, namalassii: Samernas sedvanemarker (SOU 2006:14) ja Jakt och fiske i samverkan (SOU 2005:116).