Norgga ráđđehusa mearrádus suovvat Nussir ASA viiddidit ruvkedoaimmas Fálesnuoris ja nu láhkái diktit fitnodaga luoitit ruvkebázahusaid Riehpovutnii fuolastuhttá Sámedikki. Mearrádus dahkkui vaikko Norgga Sámediggi, Norgga ráđđehusa áššedovdieiseváldi ja  Norgga Boazosámiid Riikkasearvi leat hilgon dán áigumuša birasákkaid vuođul.

Sisabahkkemat árbevirolaš sámi guovlluide dagahit vára sámegillii, ealáhusaide ja kultuvrii, ja nu láhkái goaridit sámi álbmoga boahtteáiggi. Dát lea juoga maid norgga ráđđehus ii berre bargat.

Sámediggi mearkkaša maiddái ahte mearraealáhus, riddobivdit, birasgáhtten- jaastoáiggeorganisašuvnnat seammá ákkaiguin leat hilgon ruvkebázahusaid merrii luoitima.

Sámedikki mielas lea čielggas ahte ruvkedoaimmaid váikkuhusaid lundui dábálaččat unnán lea váldon vuhtii láhkačállimiin ja geavatlaččat.

Sámediggi ávžžuha norgga ráđđehusa ođđasit árvvoštallat mearrádusa viiddiduvvon ruvkedoaimmas Fálesnuoris ja bázahusaid luoitima Riehpovutnii ja gudnejahttit sámiid rivttiid ILO 169 konvenšuvnna ja Eamiálbmotjulggaštusa mielde.

Dieđut:

Duogáš dán áššis lea ahte ruvkefitnodat Nussir lea ožžon lobi luoitit Fálesnuori veaikeruvke bázahusaid merrii Riehpovuonas. Norgga ráđđehus lea addán lobi dan dahkat ja dát boktá stuora fuomášumi maiddái riikkaidgaskasaš medias. Norga ja Tyrkia leigga áidna riikkat 53 riikkas mat hilgguiga riikkaidgaskasaš gildosa nuoskkidit meara ruvkebázahusaiguin. Dat gielddus dohkkehuvvui luonddugáhttenkonferánssas mii dollui Hawaiias 2016:s.