Sámediggi OECD-čoahkkimis
Skábmamánu 6 beaivvi doalai OECD Working Party on Rural Policy (RURWP) čoahkkima Parisas go dohkkehii raportta Ruoŧa birra. Raporttas leat ee. rávvagat got Ruoŧŧa sáhttá nannet sámiid ekonomalaš ovdáneami, ja dat lea oassin prošeavttas Linking Indigenous Communities with Regional Development.
Prošeakta galgá nannet álgoálbmogiid ekonomalaš ovdáneami ja fitnodatdoallama dainna málliin ahte buorebut heivehit regionála- ja báikegoddestrategiijaid álgoálbmotservodagaide. Dat riikkat maid OECD dán prošeavttas deattuha leat Kanada, Ruoŧŧa ja Australia.
Juohke riikka birra čállojuvvo raporta mas leat rávvagat got dát riikkat buorebut sáhttet fátmmastit álgoálbmogiid iežaset prográmmain ja strategiijain (Kanada ja Australia raporttat válbmanit boahtte jagi mielde). Raporttat vuođustuvvojit daidda dieđuide maid OECD čohkke go fitná iešguđet riikkas, ng. fact-finding missions-mátkkiin ja dain leat njeallje fokussuorggi:
- data ja statistihkka
- eananrievttit ja ekonomalaš ovdáneapmi
- fitnodatdoallan ja ovdáneapmi
- stivren ja kapasitehta.
Dán prošeavttas galgá maiddái dahkkot globála guorahallan dán golmma váldoriikkas ja iežá miellahttoriikkain. Mánnodaga lei bargobádji globála raportta birra ja prošeavtta joatkimis mas Sámediggi nai oassálasttii.
Go OECD bargojoavku RURWP doalai čoahkkima disdaga de leigga Sámedikki stivraságadoalli Per-Olof Nutti ja jurista Matilda Månsson doppe Sámedikki ovddas ovttas Ealáhusdepartemeantta ja Ovdánandoaimmahaga/Tillväxtverket ovddasteddjiiguin. OECD čállingoddi doalai oanehis ovdanbuktima raportta birra ja dan maŋŋel adde ealáhusdepartemeanta ja Sámediggi iežaset kommentáraid bargui ovdalgo raporta ovttajienalaččat dohkkehuvvui.
Maŋŋel čoahkkima de álgá siskkáldas proseassa redigeret raportta mii almmuhuvvo boahtte jagi álggus (jáhkkimis guovvamánus). Sámediggi lea juo ráhkkanan geavahit raportta Sámedikki barggus, ja danin buktit ovdan dieđuid das dievasčoahkkimis Gåbbdasavvonis skábmamánu 12 beaivvi. Máilmmiviidosaš raporta ja iežá riikkaid raporttat almmuhuvvojit 2019:s.
* OECD – ekonomalaš ovttasbarggu ja ovdáneami organisašuvdna lea riikkaidgaskasaš organisašuvdna vásáhus- ja máhttolonohallama várás dain suggiin mat váikkuhit ekonomalaš ovdáneami, eareliiggánit 35 miellahttoriikkas.