Váilevašvuođat báikegoddeprográmmas
Riikkarevišuvdna lea dárkkistan dálá báikegoddeprográmma. Dárkkisteamis gávnnaha Riikkarevišuvdna ahte lea váttis ollašuhttit prográmma ulbmiliid.
Báikegoddeprográmma lea oassi oktasaš EU-ovttasbarggus mii galgá veahkkin ”háhkat jierpmálaš ja ceavzilis ovdáneami buohkaide”. Dálá prográmmaáigodagas (2014-2020) lea várrejuvvon 37 miljárdda kruvnno Ruoŧa báikegoddeprográmmii, mas sullii 60 proseantta lea Ruoŧa ruhtadeapmi.
Prográmmaáigodaga vuosttaš njealji jagis leat leamaš oallugat geat leat ohcan doarjaga, muhto leat šaddan guhká vuordit ruđaid, ja eiseválddiide lea leamaš váttis doaimmahit bargguset. Danin lea Riikkarevišuvdna guorahallan leago 2014-2020 báikegoddeprográmma duođai hábmejuvvon ja čađahuvvon beaktilit dán rádjái.
–Riikkarevišuvdna gávnnaha ahte báikegoddeprográmma dálá hámis dahká váttisin ollašuhttit ulbmiliid, lohká riikkarevisora Helena Lindberg.
EU lea bidjan vissis gáibádusaid báikegoddeprográmma čađaheapmái, muhto miellahttoriikkat sáhttet muhtun muddui ieža mearridit viidodaga, hámi ja makkár doaimmaid háliidit deattuhit. Ruoŧa ráđđehus válljii ráhkadit hui viiddis prográmma mas leat olu doaibmabijut main dávjá leat smávva bušeahtat.
–EU njuolggadusat leat sihke olu ja moalkát, ja leat garra gáibádusat dokumentašuvdnii ja it- systemii go galgá raporteret. Go lea nu viiddis de leat hálddahusgolut lassánan sakka ja máksimat leat maŋŋonan, lohká riikkarevisora Helena Lindberg.
Dasa lassin leat it-systemat maid doarjjahálddahus galgá geavahit, maiddái leamaš maŋŋonan eaige leat doaibman nu bures.
–Eanandoallodoaimmahat ja leanastivrrat eai leat háhppehan árvvoštallat ohcamiid ja máksit doarjagiid áiggil. Várohit ahte dát čuolmmat bistet olles prográmmaáigodaga, muitala Annelie Jansson Westin, guorahallama prošeaktajođiheaddji.
Oaidnit maid ahte vaikko nu dárkilit galgá dokumenteret ja raporteret EU-njuolggadusaid jelgii, de eat aŋkke oaččo doarvái dieđuid doaimmaid bohtosiin ja váikkuhusain, ja de han ii leat dokumentašuvnnas nu olu ávki. Ii našuvnnalaš čuovvoleapmi ge leat ávkin go galgat árvvoštallat joksat go ulbmiliid.
–Ruoŧa vearroruđat ruhtadit stuora oasi báikegoddeprográmmas. Mii dárbbašit diehtit bohtosiid ja váikkuhusaid jus galgat diehtit leago dát prográmma beaktil ja olahit go joksosiid, loahpaha Helena Lindberg.
