EMRIP 11. sešuvdna Genèvas
Sámediggi čuovui EMRIP 11. Sešuvnna Genèvas suoidnemánu 9-13 beivviid 2018. Sešuvnna vuosttaš beaivvi digaštallojuvvui guorahallan mii válddahallá free, prior and informed consent (FPIC) maid EMRIP lea dahkan.
Sámediggi searvvai digaštallamiidda ja Per-Olof Nutti doalai oktasaš sáhkavuoru golmma Sámedikki, Sámi Parlamentáralaš Ráđi ja Sámiráđi bealis. Dán sáhkavuorus son kommenterii ee. davviriikkaid ovdanbuktima (geahča liŋka olgešbealde) Davviriikkalaš Sámekonvenšuvnna birra, ja son lei behtton go bargu ráđđádallanortnegiin lea bisánan.
Loga olles sáhkavuoru dás.
Nuppi beaivvi muitaledje Mexico ja Suoma ja Suoma Sámedikki ovddasteaddjit nu gohčoduvvon EMRIP country engagement birra (stáhtagalledeamit) maid EMRIP dagai 2018:s ođđa mandáhta vuođul. Lea vuosttaš geardi go EMRIP galleda riikkaid fállan dihte doarjaga ja rávvagiid álgoálbmotjulggaštusa ollašuhttima olis. Aili Keskitalo buohtastahtii iežas sáhkavuorus EMRIP galledeami Suomas ja Davviriikkalaš Sámekonvenšuvnna. Son muitalii daid rievdadusaid birra maid Sámi Parlamentáralaš Ráđđi lea evttohan davviriikkaid ráđđehusaide Davviriikkalaš Sámekonvenšuvnnas. Son dovddahii sávaldaga ahte dat rávvagat maid EMRIP attii go galledii Suoma sáhtáše leat ávkin Sámekonvenšuvnna ollašuhttimis.
Loga olles sáhkavuoru dás
Sámediggi lei Genèvas olles vahkku ja čuovui digaštallamiid maiddái iežá áššiin mat gusket EMRIP bargguide, omd. got álgoálbmotjulggaštus čađahuvvo, ja soabadanproseassaid birra. Sámedikki bealis oassálastiba stivraságadoalli Per-Olof Nutti ja Matilda Månsson gii lea jurista riikkaidgaskasaš áššiin.
EMRIP:s (Expert Mechanism on the Rights of Indigenous Peoples) leat mielde čieža álgoálbmotriektečeahpi ja dat galgá addit ON Olmmošvuoigatvuođaráđđái rávvagiid álgoálbmotáššiin álgoálbmotjulggaštusa jelgii ja veahkehit miellahttoriikkaid duohtandahkat julggaštusa sisdoalu. Loga eanet EMRIP birra dás.