Stipeandaortnet sámegieloahpahussii
Sámediggi dáhttu buoridit sámiid vejolašvuođa oažžut stipeandda go lohká sámegiela. Dát lea okta dain doaibmabijuin mat galget movttiidahttit nuoraid joatkit sámegielain maŋŋel joatkkaskuvlla.
Lea dávjá nu ahte iežá oahpahussuorggit vuoruhuvvojit ovdalii sámegiela. Jus áigu sámegieloahpaheaddjin lohkat de šaddá dan dahkat earret dábálaš oahpaheaddjeoahpu ja váldit vel eanet studieloana. Danin leat oahppan sámegieloahpaheaddjit hui vátnásat.
Lea maiddái hui stuora dárbu sámi giellabargiide. Oallugat háledit váldit ruoktot iežaset giela muhto gos ja got dan dahká go eai gávdno oahpaheaddjit? Maiddái dulkkat, jorgaleaddjit ja giellačeahpit leat unnán. Lea olu normerenbargu ja gielladikšun dagakeahttá.
Sámediggi lea čállán ráđđehussii ahte maiddái joatkkaskuvlaoahppit galggale beassat ohcat stipeandda vai ožžot movttiideami lohkat sámegiela joatkkaskuvllas.
Nu got dál lea ii oaččo Sámediggi golahit ruđaid stipeanddaide. Jus galgá sáhttit juolludit stipeanddaide ruđa, de dárbbašuvvo dasa láhkaásahus ja maid sierra ruhtajuolludus.
Stipeandaortnet gieđahallojuvvo dan giellapolitihkalaš doaibmaprográmmas maid Sámedikki dievasčoahkkin dohkkehii miessemánus 2016 (oassi 3.3).