Čoahkkin Montrealas, Kanadas, biologalaš girjáivuođa ja álgoálbmogiid birra
Juovlamánu 11-16 b 2017 lágiduvvo Montrealas, Kanadas stuora čoahkkin mas maiddái Sámediggi oassálastá, namalassii: Tenth meeting of the ad hoc open-ended Working Group on Article 8(j) and related provisions of the Convention on Biological Diversity. Biologalaš girjáivuođa konvenšuvdna lea ON-konvenšuvdna mii bođii fápmui 1993:s ja man maiddái Ruoŧŧa lea vuolláičállán. Konvenšuvnnas leat ulbmilat biologalaš girjáivuođa seailluheami ja ávkkástallama birra. Das deattuhuvvojit maiddái báikkálaš álbmogiid ja álgoálbmogiid rievttit biologalaš girjáivuhtii. Jagi 2010:s dohkkehedje máilmmi riikkat strategalaš plána biologalaš girjáivuođa ektui. Dan plánas leat 20 oasseulbmila maid gohčodit Aichiulbmilin.