Sámedikki ságadoalli Stefan Mikaelsson lea leamaš behtton stáhtaoaivámužžii ja ráđđehusoaivámužžii go ii goabbáge áigon váldit dili boahtit Sámedikki rahpamii vaikko bovdehusat leat leamaš sáddejuvvo buori áiggis.

Juohke rahpandilálašvuođas 1993 rájes leat gonagasšloahta ovddasteaddjit leamaš guossin. Muhtun gerddiid leaba gonagasbárra, muhtomin fas dušše gonagas ja 2009:s lei kruvdnoprinseassa Victoria mielde go rahpandilálašvuohta dollui Girona gávpotviesus. Duššefal 2001 rahpamis eai lean gonagaslaččat guossin go válggaid šadde čađahit ođđasis ja rahpan maŋiduvvui.

2017-2018 lea dehálaš ávvujahki sámiide. Lea čuođi jagi áigi dan rájes go sámit čoahkkanedje riikkarájiid rastá vuostálastit dalá áiggi sámepolitihka. Guovvamánu 2017:s gávnnadedje davviriikkaid Sámedikkit ja olu earát ávvudoaluin Tråantes muitin dihte vuosttaš riikkačoahkkima. 2018:s lea čuođi jagi áigi go dolle sullasaš čoahkkima Staares.

- Dál illodalan deaivvadit kruvdnoprinseassain ja lean ilus go šloahtta lea jorggihan áššis, lohká  Stefan Mikaelsson.

Ruoŧa ráđđehusa bealis boahtá kultur- ja demokratiijaministtar Alice Bah Kuhnke.

Álgosiiddu kaleandaris oainnát min prográmma.