Illubeaivi visot upmisápmelaččaide
Viimmat lea ubmisámegiela ortografiija dohkkehuvvon! Odne cuoŋománu 6 b 2016 ledje Gammplatsenis Likssjuos (Lycksele) almmolaš meanut ubmisámegiela čállingiela dohkkeheami oktavuođas. Sámedikki giellalávdegotti ságadoalli Josefina Skerk sávvá odne lihku visot ubmisámiide.
Dát lea historjjálaš beaivi visot ubmisámiide, lea sihke dohkkehussan ja vuoitun sidjiide. Vuosttaš girjjit mat ilbme sámegillii 1600-logus ledje ubmisámegillii. Dasto jávkagođii giella garra giellavealaheami maŋŋel mii bisttii jahkečuđiid.
- Dál mis leat njeallje almmolaš sámegiela Ruoŧas, lohká Skerk. Go ubmisámegiella dál dohkkehuvvo de šaddá álkit bargat ubmisámegiela ealáskahttimiin. Dalle sáhttá almmuhit girjjiid ja oahpponeavvuid ubmisámegillii, ja šaddá vejolaš váldit oahpaheaddjeeksámena ubmisámegielas, čilge Skerk.
Ubmisámegiela bargojoavkkus leat leamaš mielde Henrik Barruk, Olavi Korhonen, Pekka Sammalahti ja Ole Henrik Magga, ja joavku lea bargan Sámi Giellagáldu ovddas. Go sin bargu dál loahpahuvvo ja raporta vuolláičállojuvvo, de dahká Sámi Parlamentáralaš Ráđđi mearrádusa ahte ortografiija lea dohkkehuvvon.
Go dál dahkko virggálaš mearrádus ortografiija birra de buktá dat nuppástusaid davviriikkalaš giellaovttasbarggus. Sámediggi ferte ođasmahttigoahtit iežas diehtojuohkinmateriála, govaid, báikenammalisttuid jna. vai dat dás duohko gávdnojit maiddái ubmisámegillii.
- Lea leamaš lossa rahčamuš, ja ain lea olu bargu ovddabealde, cealká Josefina Skerk guhte lea Sámedikki giellalávdegotti ságadoalli ja ieš ubmisápmelaš. Mun háliidan giitit buohkaid geat nu garrasit leat áŋgiruššan dán barggus. Dál lea vuođđu sajis, ja mii sáhttit iluin huksegoahtit ubmisámegiela boahtteáiggi!
Váldde oktavuođa:
Josefina Skerk, giellalávdegotti ságadoalli
070-582 21 21