Davvisámegiella
Davvisámegiella hubmojuvvo ruoŧabealde, norggabealde ja suomabealde. Suopman mii gávdno ruoŧabealde gohčoduvvo durdnossámegiellan ja dasa gullet dat suopmanat mat hubmojuvvojit Gárasavvona, Čohkkirasa ja Jiellevári guovlluin.
Davvisámegiela lohket leat dat sámegiella mii lea unnimusat uhkiduvvon otná dilis. Dasa leat iešguđet ge sivat, akta lea dat ahte giella hubmojuvvo stuora guovllus ja ahte gávdnojit guovddáš báikkit gos sámegiella lea eanetlogugiella.
Ollu materiála davvisámegillii ráhkaduvvo norgga bealde, nu maid dat materiála mii gávdno webbas. Dás gurutbealde gávnnat liŋkkaid siidduide main lea davvisámegielat materiála.