Sámedikki stivra deaivvadii poliisahoavddaiguin
Sámediggi lea deaivvadan poliisahoavddaiguin ságastit áššiid birra mat gusket sámiide nuorttamus leanain.
Mannan čavčča bovdii Sámedikki stivra poliisaeiseváldi čoahkkimii digaštallat áššiid mat gusket sámiide. Dát jearaldagat šadde vel eanet áigeguovdilin maŋŋel TV-prográmma Kalla Fakta boazosuoládemiid birra. Ođđajagimánus 28 b 2016 lei čoahkkin mas Sámedikki stivra ja Klas Johansson, Region Norr- hoavda, Håkan Karlsson, Norrbotten poliisaguovllu hoavda ja sadjásaš hoavda Michael Säll Lindahl, oassálaste.
Lea čielggas ahte leat erohusat leanaid gaskka. Muhtun váttisvuođat leat eanet dábálaččat vissis guovlluin. Nuorttamus leanain leat viiddis ávdinguovllut ja smávva báikegottit. Helikopterbearráigeahčču lea dábálaččat skohtergielddusguovlluin, gos isket ahte olbmot eai vuoje juhkanvuođas ja faunavákšuma várás.
- Regiovnnat eai oamas helikopteriid ieža, lea našuvnnalaš doaibmaossodat mii mearrida, čilge Klas Johansson.
Stuorimus ášši čoahkkimis lea boazosuoládeapmi ja lobihis njuovvan. Daid rihkkosiid lea váttis guorahallat, ja dávjá váilot vihtanat eai ge leat doarvái nanu duođaštusat dubmet vearredahkkiid. Poliisa ávžžuha dattege buohkaid ilmmuhit lobihuššamiid poliissaide. Dat lea dehálaš vai oaidnit minstariid ja vai sáhttá álggahit vákšuma. Lea dehálaš oažžut ovdan rievttes statistihkaid. Čoahkkimis lei maid sáhka das got bivdorihkus šaddá vašširihkusáššin.
Bohccuid vuddjomat ja raŧiid áiddiid divodeapmi lei maid áššin. Čearut váillahit áidedivodemiid ja vásedin geainnuid gokko bohccot besset raŧiid rastá. Lea Johtolatdoaimmahat mii gieđahallá dakkár áššiid.
- Poliissain lea almmotge guovddáš rolla johtolatsihkarvuođa barggus, ja eiseváldin mii sáhttit váikkuhit aktevrraid ja veahkkin čilget váttisvuođaid, lohká poliisahoavda Håkan Karlsson guhte maiddái lea ságadoalli Viltolycksrådet nammasaš ráđis.